നീണ്ടൂരില്‍ യുവാവിനെ കുത്തിക്കൊലപ്പെടുത്തിയ കേസുമായി ബന്ധപ്പെട്ട് നാലുപേര്‍ കൂടി അറസ്റ്റില്‍.

നീണ്ടൂരില്‍ യുവാവിനെ കുത്തിക്കൊലപ്പെടുത്തിയ കേസുമായി ബന്ധപ്പെട്ട് നാലുപേര്‍ കൂടി അറസ്റ്റില്‍. നീണ്ടൂര്‍ ഓണംതുരത്ത് ഭാഗത്ത് വച്ച് യുവാവിനെ കുത്തിക്കൊലപ്പെടുത്തിയ കേസുമായി ബന്ധപ്പെട്ട് നാലു പേരെ കൂടി പോലീസ് അറസ്റ്റ് ചെയ്തു. നീണ്ടൂര്‍ മുകളേ സുജിത്ത് ബാബു (23), കൈപ്പുഴ താന്നിച്ചുവട്ടില്‍  ജോബിന്‍ ജോണി (22), നീണ്ടൂര്‍ തെങ്ങുംപള്ളില്‍ വീട്ടില്‍ ശിവ സൈജു (24), നീണ്ടൂര്‍ അരീപറമ്പില്‍ വീട്ടില്‍ ഐസക്ക് മാത്യു (22) എന്നിവരെയാണ് ഏറ്റുമാനൂര്‍ പോലീസ് അറസ്റ്റ് ചെയ്തത്. ഇവര്‍ സംഘം ചേര്‍ന്ന് കഴിഞ്ഞദിവസം രാത്രി അശ്വിനെയും, സുഹൃത്തായ അനന്തുവിനെയും ആക്രമിക്കുകയും അശ്വിനെ കുത്തി കൊലപ്പെടുത്തുകയുമായിരുന്നു. പ്രതികളും ഇവരും തമ്മില്‍ വൈകിട്ട് നീണ്ടൂര്‍ പ്ലാസ ബാറില്‍ വച്ച് വാക്കുതര്‍ക്കം ഉണ്ടായിരുന്നു. അശ്വിനെയും,അനന്തുവിനെയും വിളിച്ചുവരുത്തി ആക്രമിച്ച്  അശ്വിനെ കുത്തി കൊലപ്പെടുത്തുകയായിരുന്നു. തുടര്‍ന്ന് ഇവര്‍ സംഭവസ്ഥലത്ത് നിന്ന് കടന്നുകളയുകയും ചെയ്തു. പരാതിയെ തുടര്‍ന്ന് ഏറ്റുമാനൂര്‍ പോലീസ് കേസ് രജിസ്റ്റര്‍ ചെയ്യുകയും  ജില്ലാ പോലീസ് മേധാവി കെ കാര്‍ത്തിക്കിന്റെ നേതൃത്വത്തിലുള്ള അന്വേഷണസംഘം  അനന്തു സുരേന്ദ്രന്‍ (22), അജിത്ത് (24) എന്നിവരെ ഇന്നലെ പിടികൂടിയിരുന്നു. തുടര്‍ന്ന് നടത്തിയ ശക്തമായ തിരച്ചിലിനൊടുവിലാണ് ഇവരെ വിവിധ സ്ഥലങ്ങളില്‍ നിന്നായി അന്വേഷണസംഘം പിടികൂടുന്നത്. ശിവ സൈജുവിന് ഗാന്ധിനഗര്‍ സ്റ്റേഷനില്‍ ക്രിമിനല്‍ കേസ് നിലവിലുണ്ട്. ഏറ്റുമാനൂര്‍ സ്റ്റേഷന്‍ എസ്.എച്ച്.ഒ പ്രസാദ് അബ്രഹാം വര്‍ഗീസ്, എസ്.ഐ ഷാജഹാന്‍ എന്നിവരും അന്വേഷണ സംഘത്തില്‍ ഉണ്ടായിരുന്നു. കോടതിയില്‍ ഹാജരാക്കിയ നാലു പേരെയും റിമാന്‍ഡ്  ചെയ്തു.