കടനാട് സര്‍വീസ് സഹകരണ ബാങ്കിനു മുന്നില്‍ ഉപരോധ സമരം

കടനാട് സര്‍വീസ് സഹകരണ ബാങ്കിനു മുന്നില്‍ നിക്ഷേപകരുടെ  ഉപരോധ സമരം. സാമ്പത്തിക പ്രതിസന്ധിയിലായ ബാങ്കില്‍ നിന്നും നിക്ഷേപിച്ച പണം തിരികെ ലഭിക്കാതെ വന്നതോടെയാണ് നിക്ഷേപകര്‍ സമരരംഗത്തിറങ്ങിയത്. നൂറോളം നിക്ഷേപകരാണ് തിങ്കളാഴ്ച രാവിലെ ബാങ്കിലെത്തിയത്. നിക്ഷേപകരെ ബാങ്കിനുള്ളിലേക്ക് കടക്കാന്‍ പോലീസ് അനുവദിച്ചില്ല.  ഇതേതുടര്‍ന്ന് പോലീസുമായി വലിയ വാക്കേറ്റവും ഉന്തും തള്ളും ഉണ്ടായി.

 രണ്ടു പോലീസുകാര്‍ മാത്രമാണ് ആളുകളെ നിയന്ത്രിക്കാന്‍ ഉണ്ടായിരുന്നത്. കൂടുതല്‍ പോലീസും സ്ഥലത്തെത്തി. അരമണിക്കൂറോളം നീണ്ട വാക്കുതര്‍ക്കത്തെ തുടര്‍ന്നാണ് ആളുകളെ അകത്തുകടക്കാന്‍ സമ്മതിച്ചത്. നിക്ഷേപങ്ങള്‍ തിരികെ ലഭിക്കാന്‍ നടപടികളുണ്ടായില്ലെങ്കില്‍  റോഡ് ഉപരോധം അടക്കം കൂടുതല്‍ ശക്തമായ സമരപരിപാടികള്‍ നടത്താനാണ് നിക്ഷേപകരുടെ നീക്കം. വായ്പ തിരിച്ചടയ്ക്കാത്തവര്‍ക്കെതിരെ നിയമ നടപടികള്‍ മുന്നോട്ട് പോവുകയാണെന്ന് അഡിമിനിസ്‌ട്രേറ്റര്‍ അറിയിച്ചു. മതിപ്പുവിലയേക്കാള്‍ കൂടുതല്‍ തുക വായ്പയായി നല്കിയ സംഭവത്തില്‍ സെക്രട്ടറിയെ അറസ്റ്റ് ചെയ്യണമെന്ന് നിക്ഷേപകര്‍ ആവശ്യപ്പെട്ടു.