സീറോ മലബാര്‍ സഭയുടെ നിയുക്ത കര്‍ദ്ദിനാള്‍ മോണ്‍. ജോര്‍ജ് കൂവക്കാടിന്റെ മെത്രാഭിഷേകം നവംബര്‍ 24ന് ഉച്ചകഴിഞ്ഞ് 2.00 മണിക്ക് ചങ്ങനാശേരി മെത്രാപ്പോലീത്തന്‍ പള്ളിയില്‍ നടക്കുമെന്ന് രൂപതാ അധികൃതര്‍ വാര്‍ത്താസമ്മേളനത്തില്‍ അറിയിച്ചു. ചങ്ങനാശേരി അതിരൂപതാ മെത്രാപ്പോലീത്താ ആര്‍ച്ച് ബിഷപ് മാര്‍ തോമസ് തറയില്‍ ഏവരെയും സ്വാഗതം ചെയ്യും. തുടര്‍ന്ന് മെത്രാഭിഷേകത്തിന്റെ തിരുകര്‍മങ്ങള്‍ ആരംഭിക്കും. സീറോമലബാര്‍ സഭയുടെ മേജര്‍ ആര്‍ച്ച് ബിഷപ് മാര്‍ റാഫേല്‍ തട്ടില്‍ കാര്‍മികനായിരിക്കും. ആര്‍ച്ച് ബിഷപ് മാര്‍ തോമസ് തറയില്‍, വത്തിക്കാന്‍ സെക്രട്ടറിയേറ്റ് ഓഫ് സ്റ്റേറ്റ് പ്രതിനിധി ആര്‍ച്ച് ബിഷപ് മോസ്റ്റ് റവ.ഡോ. എഡ്ഗര്‍ പാര്‍റ എന്നിവര്‍ സഹകാര്‍മികരായിരിക്കും. ആര്‍ച്ച് ബിഷപ് മാര്‍ ജോര്‍ജ് കൂവക്കാടിന്റെ കാര്‍മികത്വത്തില്‍ അര്‍പ്പിക്കപ്പെടുന്ന വി. കുര്‍ബാന മധ്യേ സീറോ മലങ്കര കത്തോലിക്കാ മേജര്‍ ആര്‍ച്ച് ബിഷപ് കര്‍ദിനാള്‍ ബസേലിയോസ് മാര്‍ ക്ലീമിസ് വചനസന്ദേശം നല്‍കും. കര്‍ദിനാള്‍ മാര്‍ ജോര്‍ജ് ആലഞ്ചേരി, ആര്‍ച്ച് ബിഷപ് റവ.ഡോ. എഡ്ഗര്‍ പാര്‍റ, ചങ്ങനാശേരി അതിരൂപതാ മുന്‍ മെത്രാപ്പോലീത്ത മാര്‍ ജോസഫ് പെരുന്തോട്ടം, ഷംഷാബാദ് രൂപതാ സഹായ മെത്രാന്‍ മാര്‍ തോമസ് പാടിയത്ത്, ചെത്തിപ്പുഴ തിരുഹ്യദയപള്ളി വികാരിയും ആശ്രമം പ്രയോരും മാര്‍ ജോര്‍ജ് കൂവക്കാടിന്റെ മാതൃ സഹോദരനുമായ റവ. ഫാ. തോമസ് കല്ലുകളം എന്നിവര്‍ ആശംസകളര്‍പ്പിച്ചു സംസാരിക്കും. മാര്‍ ജോര്‍ജ് കൂവക്കാട് എല്ലാവര്‍ക്കും നന്ദിയര്‍പ്പിക്കും.
.jpg)
0 Comments