മണ്ഡല മഹോത്സവം പരാതി രഹിതമായി പര്യവസാനിക്കുന്നത് കൂട്ടായ പ്രവര്‍ത്തനങ്ങളുടെ ഫലമാണെന്ന് ദേവസ്വം വകുപ്പുമന്ത്രി വി.എന്‍. വാസവന്‍

ശബരിമലയില്‍ 41 ദിവസത്തെ മണ്ഡല മഹോത്സവം പരാതി രഹിതമായി പര്യവസാനിക്കുന്നത് കൂട്ടായ പ്രവര്‍ത്തനങ്ങളുടെ ഫലമാണെന്ന് ദേവസ്വം വകുപ്പുമന്ത്രി വി.എന്‍. വാസവന്‍. മണ്ഡലപൂജ ക്രമീകരണങ്ങളും മകരവിളക്ക് ഒരുക്കങ്ങളും വിലയിരുത്താന്‍ ശബരിമല സന്നിധാനത്തു സന്ദര്‍ശനത്തിനെത്തിയ ശേഷം സംസാരിക്കുകയായിരുന്നു മന്ത്രി.  ഒരുലക്ഷത്തിലേറെ തീര്‍ഥാടകര്‍ വന്ന ദിവസമുണ്ടായിട്ടും ഒരാള്‍ പോലും ദര്‍ശനം കിട്ടാതെ മടങ്ങേണ്ടി വന്ന സാഹചര്യമുണ്ടാവാത്തതിനു കാരണം ആസൂത്രണത്തിലെ മികവാണ്.

സംസ്ഥാന സര്‍ക്കാരും ദേവസ്വം ബോര്‍ഡും സന്നദ്ധ സംഘടകളെക്കൂടി ഉള്‍പ്പെടുത്തി കാലേകൂട്ടി ചര്‍ച്ചകള്‍ നടത്തിയിരുന്നു. മുന്‍വര്‍ഷത്തെ അപേക്ഷിച്ച് അഞ്ചുലക്ഷത്തോളം ഭക്തരാണ് ഈ 41 ദിവസത്തെ കാലയളവില്‍ കൂടുതലായി എത്തിയത്.  വരുമാനം മുന്‍വര്‍ഷത്തെ അപേക്ഷിച്ച് 28 കോടി രൂപയോളം കൂടുതലാണെന്നാണ് താല്‍ക്കാലികമായി ലഭ്യമായ കണക്ക്.  ദര്‍ശനം കിട്ടാതെ വന്നതായി ആരും പരാതിപ്പെട്ടിട്ടില്ല. സുഗമമായ ദര്‍ശനം ഉറപ്പാക്കാനായി എന്നു വന്നവര്‍ തന്നെ പറയുന്നു. മലകയറിവന്ന എല്ലാവര്‍ക്കും സൗജന്യഭക്ഷണം ഉറപ്പാക്കാനായി.  അപ്പവും അരവണയും എല്ലാവര്‍ക്കും ലഭിക്കുമെന്ന് ഉറപ്പാക്കി. ഡിസംബര്‍ 28ന് നടക്കുന്ന യോഗത്തില്‍  മകരവിളക്കുമായി ബന്ധപ്പെട്ട എല്ലാ മുന്നൊരുക്കങ്ങളും ചര്‍ച്ച ചെയ്തു തീരുമാനമെടുക്കുമെന്നു മന്ത്രി വി.എന്‍.വാസവന്‍ പറഞ്ഞു.