യുവാവിനെ കൊലപ്പെടുത്താന്‍ ശ്രമിച്ച കേസില്‍ രണ്ടുപേരെ പോലീസ് അറസ്റ്റ് ചെയ്തു

യുവാവിനെ കൊലപ്പെടുത്താന്‍ ശ്രമിച്ച കേസില്‍ രണ്ടുപേരെ പോലീസ് അറസ്റ്റ് ചെയ്തു. കങ്ങഴ ഇടയിരിക്കപ്പുഴ  ഒറ്റപ്ലാക്കല്‍ വീട്ടില്‍ രാഹുല്‍ പ്രസാദ് (23), കങ്ങഴ ഇലയ്ക്കാട്  നടുവിലേടത്ത് വീട്ടില്‍ നൗഫല്‍.എന്‍ (27) എന്നിവരെയാണ് കറുകച്ചാല്‍ പോലീസ് അറസ്റ്റ് ചെയ്തത്. ഇവരും സുഹൃത്തുക്കളും ചേര്‍ന്ന്   കഴിഞ്ഞദിവസം രാത്രിയില്‍ ഭാര്യയും കുഞ്ഞുമായി ബൈക്കില്‍ പോവുകയായിരുന്ന കങ്ങഴ സ്വദേശിയായ യുവാവിനെ  ആക്രമിച്ചു കൊലപ്പെടുത്താന്‍ ശ്രമിക്കുകയായിരുന്നു. യുവാവും കുടുംബവും വരുന്ന വഴിയില്‍  ഇവര്‍ പടക്കം പൊട്ടിക്കുന്നത് കണ്ട് യുവാവ് ബൈക്ക് നിര്‍ത്തുകയായിരുന്നു.

 ഇതു കണ്ട ഇവര്‍ യുവാവിന്റെ ഭാര്യയെ ചീത്ത വിളിച്ചത് യുവാവ് ചോദ്യം ചെയ്തതിനെ  തുടര്‍ന്ന്  ഇവര്‍ യുവാവിനെ സംഘം  ചേര്‍ന്ന് ചീത്ത വിളിക്കുകയും, മര്‍ദ്ദിക്കുകയും, ബൈക്കില്‍ ഉപയോഗിക്കുന്ന ചെയിന്‍ സോക്കറ്റിന്റെ പകുതി മുറിച്ച മുനയുള്ള ഭാഗം ഉപയോഗിച്ച് യുവാവിനെ ആക്രമിച്ച് കൊലപ്പെടുത്താന്‍ ശ്രമിക്കുകയുമായിരുന്നു. ഇതു കണ്ട് തടയാന്‍ ശ്രമിച്ച യുവാവിന്റെ സഹോദരനെയും ഇവര്‍ ആക്രമിച്ചു. പരാതിയെ തുടര്‍ന്ന് കറുകച്ചാല്‍  പോലീസ് കേസ് രജിസ്റ്റര്‍ ചെയ്യുകയും തുടര്‍ന്ന് നടത്തിയ തിരച്ചിലില്‍ ഇരുവരെയും പിടികൂടുകയുമായിരുന്നു. കറുകച്ചാല്‍ സ്റ്റേഷന്‍ എസ്.എച്ച്.ഓ പ്രശോഭ്, എസ്.ഐ വിജയകുമാര്‍, സി.പി.ഓ മാരായ വിവേക്, ഡെന്നി, രഞ്ജിത്ത്, ബ്രിജിത്ത്  എന്നിവര്‍ ചേര്‍ന്നാണ് ഇവരെ അറസ്റ്റ് ചെയ്തത്. രാഹുല്‍ പ്രസാദിന് മണിമല സ്റ്റേഷനിലും, നൗഫലിന്  കറുകച്ചാല്‍ സ്റ്റേഷനിലും ക്രിമിനല്‍ കേസുകള്‍ നിലവിലുണ്ട്. കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു. മറ്റു പ്രതികള്‍ക്ക് വേണ്ടി തിരച്ചില്‍ ശക്തമാക്കി.