അഖിലേന്ത്യ അന്തര്‍ സര്‍വകലാശാല പുരുഷ വിഭാഗം വോളിബോള്‍ ചാമ്പ്യന്‍ഷിപ്പിന് പാലാ സെന്റ് തോമസ് കോളേജില്‍ തുടക്കമായി. ഇന്ത്യയിലെ വിവിധ സോണുകളില്‍ നിന്നായി യോഗ്യത നേടിയ 16 ടീമുകളാണ് അഖിലേന്ത്യ അന്തര്‍ സര്‍വകലാശാല ചാമ്പ്യന്‍ഷിപ്പില്‍ മാറ്റുരയ്ക്കുന്നത്. മുതല്‍ ജിമ്മി ജോര്‍ജ് സ്റ്റേഡിയം, സെന്റ് തോമസ് കോളേജ്, ഇന്റഗ്രേറ്റഡ് സ്‌പോര്‍ട്സ് കോംപ്ലക്‌സ് സെന്റ് തോമസ് കോളേജ്, പാലാ അല്‍ഫോന്‍സാ കോളേജ് എന്നീ മൂന്ന് വേദികളില്‍ ആയിട്ടാണ് പ്രാഥമിക ലീഗ് റൗണ്ട് മത്സരങ്ങള്‍ അരങ്ങേറുന്നത്.
നോക്ക്ഔട്ട് മത്സരങ്ങള്‍ ബുധനാഴ്ച രാവിലെ 6.30 മുതല്‍ ആരംഭിക്കും. മുന്‍ വര്‍ഷത്തെ ജേതാക്കളായ എസ്ആര്‍എം യൂണിവേഴ്‌സിറ്റി ചെന്നൈ, കാലിക്കറ്റ് യൂണിവേഴ്‌സിറ്റി, മദ്രാസ് യൂണിവേഴ്‌സിറ്റി, കുരുക്ഷേത്ര യൂണിവേഴ്‌സിറ്റി, ഗുരുനാനാക്ക് ദേവ് യൂണിവേഴ്‌സിറ്റി പഞ്ചാബ്, പഞ്ചാബി യൂണിവേഴ്‌സിറ്റി തുടങ്ങിയ പ്രമുഖ ടീമുകളാണ് ചാമ്പ്യന്‍ഷിപ്പില്‍ മാറ്റുരയ്ക്കുന്നത്.മത്സരങ്ങളുടെ ഉദ്ഘാടനം വോളിബോള്‍ ഇതിഹാസവും കോളേജിന്റെ പൂര്‍വ്വ വിദ്യാര്‍ത്ഥിയുമായ ജിമ്മി ജോര്‍ജിന്റെ നാമധേയത്തിലുള്ള സ്റ്റേഡിയത്തില്‍ നടന്നു. കേരള സംസ്ഥാന ജല വിഭവ വകുപ്പ് മന്ത്രി റോഷി അഗസ്റ്റിന്‍ ഉദ്ഘാടനം ചെയ്തു. മഹാത്മാഗാന്ധി സര്‍വ്വകലാശാല വൈസ് ചാന്‍സിലര്‍ പ്രൊഫ. ഡോ സി.റ്റി അരവിന്ദകുമാര്‍ അധ്യക്ഷനായിരുന്നു.മാണി സി കാപ്പന്‍ MLA ജേതാക്കള്‍ക്കുള്ള ട്രോഫികള്‍ അനാച്ഛാദനം ചെയ്തു. ടൂര്‍ണമെന്റ് വെള്ളിയാഴ്ച സമാപിക്കും.
0 Comments