തലയോലപ്പറമ്പ് സെന്റ് ജോര്‍ജ് പള്ളിയുടെ വാതിലിന്റെ പൂട്ട് തകര്‍ത്ത് അകത്തുകയറി 1.83 ലക്ഷം രൂപ മോഷ്ടിച്ചയാളെ പോലീസ് അറസ്റ്റ് ചെയ്തു. ഇടുക്കി വെള്ളത്തൂവല്‍ സ്വദേശി പത്മനാഭന്‍ (64) എന്നയാളെയാണ് തലയോലപ്പറമ്പ് പോലീസ് അറസ്റ്റ് ചെയ്തത്. ഫെബ്രുവരി പത്താം തീയതി ആയിരുന്നു പള്ളിയില്‍ മോഷണം നടന്നത്.. പുലര്‍ച്ചെ പള്ളിയുടെ വാതിലിന്റെ പൂട്ട് പൊളിച്ച് അകത്തുകയറി മുറിയില്‍ ഉണ്ടായിരുന്ന അലമാരയുടെ പൂട്ട് പൊളിച്ച് ഒരു ലക്ഷത്തി എണ്‍പത്തി മുവായിരം രൂപ മോഷ്ടിച്ച് കടന്നു കളയുകയായിരുന്നു.
ജില്ലാ പോലീസ് മേധാവി ഷാഹുല്‍ ഹമീദിന്റെ പ്രത്യേക നിര്‍ദ്ദേശത്തെ തുടര്‍ന്ന് വൈക്കം ഡിവൈഎസ്പി സിബിച്ചന്‍ ജോസഫിന്റെ നേതൃത്വത്തില്‍ രൂപീകരിച്ച പ്രത്യേക അന്വേഷണ സംഘം ഇയാളെ തൃശ്ശൂര്‍ വടക്കാഞ്ചേരിയില്‍ നിന്നും പിടികൂടുകയുമായിരുന്നു. സൈബര്‍ സെല്ലിന്റെ സഹായത്തോടെ ഇയാള്‍ വടക്കാഞ്ചേരിയില്‍ ഉണ്ടെന്ന് കണ്ടെത്തിയ അന്വേഷണ സംഘം അവിടുത്തെ ഓര്‍ത്തഡോക്‌സ് ചര്‍ച്ചില്‍ മോഷണം നടത്താന്‍ സാധ്യതയുണ്ടെന്ന് മനസ്സിലാക്കുകയും മോഷണത്തിനായി എത്തിയ സമയത്ത് സാഹസികമായി പിടികൂടുകയായിരുന്നു. ഇയാളുടെ ബാഗില്‍ നിന്നും കഠാരയും, വാതിലിന്റെയും,ജനലിന്റെയും പൂട്ടുപൊളിക്കുന്ന പ്രത്യേകം ഇരുമ്പ് ഉപകരണവും, പെപ്പര്‍ സ്‌പ്രേയും വിവിധ തരത്തിലുള്ള സ്‌ക്രൂ ഡ്രൈവറുകളും കണ്ടെടുത്തു. തലയോലപ്പറമ്പ് എസ്.ഐ ജയകുമാര്‍, സി.പി.ഓ മാരായ മനീഷ്, ബിനു പി.എം എന്നിവരാണ് അന്വേഷണസംഘത്തില്‍ ഉണ്ടായിരുന്നത്.
.webp)
0 Comments