തട്ടുകടയില്‍ ഉണ്ടായ സംഘര്‍ഷത്തെക്കുറിച്ച് ഗുരുതര ആരോപണങ്ങളുന്നയിച്ച് കടയുടമ ജോയി.

പാലായില്‍ പ്രവര്‍ത്തിക്കുന്ന തട്ടുകടയില്‍ ഉണ്ടായ സംഘര്‍ഷത്തെക്കുറിച്ച് ഗുരുതര ആരോപണങ്ങളുന്നയിച്ച് കടയുടമ ജോയി.   ബഹളമുണ്ടാക്കിയ വനിതകള്‍ അടക്കമുള്ളവര്‍ മദ്യലഹരിയില്‍ ആയിരുന്നെന്ന്  ജോയി ആരോപിച്ചു. കഴിഞ്ഞ ദിവസം വൈകുന്നേരം പാലാ ഈരാറ്റുപേട്ട റൂട്ടില്‍ പ്രവര്‍ത്തിക്കുന്ന ജോയ്‌സ്  ഫാസ്റ്റ് ഫുഡ് കടയില്‍ ഭക്ഷണം കഴിക്കാനെത്തിയ എറണാകുളം വരാപ്പുഴ സ്വദേശികളായ വിനോദ സഞ്ചാരികളുമായാണ് സംഘര്‍ഷമുണ്ടായത്. ഭക്ഷണം കഴിച്ചതിനു ശേഷം വീണ്ടും ഭക്ഷണം ഓര്‍ഡര്‍ ചെയ്യുകയും, അത് റോഡില്‍ പാര്‍ക്ക് ചെയ്തിരുന്ന ട്രാവലര്‍ വാഹനത്തിനുള്ളില്‍ കൊണ്ട് വെച്ച് കഴിക്കുകയും മദ്യപിക്കുകയും ചെയ്ത ശേഷം പഴകിയ ഭക്ഷണമാണ് എന്ന് കടയുടമയോട് പറയുകയായിരുന്നു.

 സ്ത്രീകള്‍ അടക്കമുള്ളവര്‍ മദ്യലഹരിയില്‍ ജീവനക്കാരെയും തന്നെയും ആക്രമിക്കുകയും വെല്ലുവിളിക്കുകയുമായിരുന്നു എന്ന് തട്ടുകട ഉടമ ജോയ് പറയുന്നു. ഇരുപതു വര്‍ഷത്തിലേറെയായി തട്ടുകട നടത്തുന്ന താന്‍ ഇതുവരെ പഴകിയ ഭക്ഷണം നല്‍കിയിട്ടില്ലെന്നും മദ്യലഹരിയില്‍ വിനോദസഞ്ചാരികള്‍ നടത്തിയ ആക്രമണം തന്നെ ഞെട്ടിച്ചെന്നും ജോയ് പറയുന്നു. തന്നെ ആക്രമിച്ച ശേഷം സമീപത്തുള്ള ആശുപത്രിയില്‍ ചികിത്സ തേടി കള്ളക്കേസ് കൊടുക്കാനും തന്നെയും തന്റെ വ്യാപാര സ്ഥാപനത്തെയും പൊതു സമൂഹത്തിനു മുന്‍പില്‍  താഴ്ത്തികെട്ടുന്നതിനും വന്നവര്‍ ചില മാധ്യമങ്ങളെ ഉപയോഗിച്ചെന്നും ജോയ് പറയുന്നു. സംഭവത്തില്‍ സ്ഥലത്തെത്തിയ പോലീസ് അധികാരികള്‍ ഇടപെട്ടാണ് രംഗം ശാന്തമാക്കിയത് എന്നും വിഷയത്തില്‍ എറണാകുളം വരാപ്പുഴ സ്വദേശികള്‍ക്കെതിരെ നിയമ നടപടി സ്വീകരിക്കുമെന്നും തട്ടുകട ഉടമ വാര്‍ത്താ സമ്മേളനത്തില്‍ പറഞ്ഞു.