പാലാ രൂപതയിലെ മുഴുവന്‍ ഇടവകകളെയും പങ്കെടുപ്പിച്ചു കൊണ്ട് ലഹരി വിരുദ്ധ മഹാസമ്മേളനം ഞായറാഴ്ച നടക്കും.മദ്യവും, മാരക ലഹരികളും സമൂഹത്തിനും, കുടുംബങ്ങള്‍ക്കും ഗുരുതര ഭീഷണിയുയര്‍ത്തുന്നതിന്റെ പശ്ചാത്തലത്തില്‍ പാലാ രൂപതയിലെ മുഴുവന്‍ ഇടവകകളെയും ലഹരിക്കെതിരെ ഉണര്‍ത്തുകയെന്ന ലക്ഷ്യവുമായാണ് മഹാ സമ്മേളനം നടത്തുന്നത്. ഞായറാഴ്ച ഉച്ചകഴിഞ്ഞ് 2 ന് നടക്കുന്ന സമ്മേളനം പാലാ രൂപതാ മെത്രന്‍ മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും.
ബിഷപ് ജോസഫ് കല്ലറങ്ങാട്ടിന്റെ പ്രത്യേക നിര്‍ദ്ദേശം പ്രകാരമാണ് സമ്മേളനം വിളിച്ചു ചേര്‍ത്തിരിക്കുന്നത്. മദ്യവും, ലഹരി വസ്തുക്കളും നമ്മുടെ സമൂഹത്തെയോ, സംവിധാനങ്ങളെയോ ഒരു വിധത്തിലും സ്വാധീനിക്കുന്നില്ലെന്ന് ഉറപ്പാക്കേണ്ടതിന്റെ ഉത്തരവാദിത്വം നമുക്കുണ്ടെന്നും മാരക ലഹരി വസ്തുക്കള്‍ പൊതു സമൂഹത്തില്‍ അനിയന്ത്രിതമാം വിധം വ്യാപിക്കുന്നതും ഇതിനെ തുടര്‍ന്ന് അക്രമങ്ങളും കൊലപാതങ്ങളും അനിഷ്ട സംഭവങ്ങളും വര്‍ദ്ധിച്ചുവരുന്നതും നാം തിരിച്ചറിയണമെന്നും ബിഷപ്പ് കല്ലറങ്ങാട്ട് 171 ഇടവക വികാരിമാര്‍ക്കും അയച്ച കത്തില്‍ ഓര്‍മ്മിപ്പിച്ചു. പാലാ ളാലം സെന്റ് മേരീസ് പഴയ പള്ളി പാരിഷ്ഹാളില്‍ നടക്കുന്ന സമ്മേളനത്തില്‍ രൂപതാ പ്രസിഡന്റും സംസ്ഥാന സെക്രട്ടറിയുമായ പ്രസാദ് കുരുവിള അദ്ധ്യക്ഷനായിരിക്കും . രൂപതാ ഡയറക്ടര്‍ ഫാ. ജോസഫ് വെള്ളമരുതുങ്കല്‍, എസ്.എം.വൈ.എം. ഡയറക്ടര്‍, ഫാ. മാണി കൊഴുപ്പന്‍കുറ്റി, ജാഗ്രതാ സെല്‍ ഡയറക്ടര്‍ ഫാ. ജോസഫ് അരിമറ്റം, സാബു എബ്രഹാം ആന്റണി മാത്യു, ജോസ് കവിയില്‍, അലക്സ് കെ. എമ്മാനുവേല്‍ എന്നിവര്‍ പ്രസംഗിക്കും. കോട്ടയം, ഇടുക്കി, എറണാകുളം ജില്ലകളിലായി വ്യാപിച്ചു കിടക്കുന്ന പാലാ രൂപതയുടെ ഓരോ ഇടവകയില്‍ നിന്നും മുതിര്‍ന്നവരും യുവജനങ്ങളുമായി നൂറ് കണക്കിന് വിശ്വാസികള്‍ മഹാസമ്മേളനത്തില്‍ പങ്കെടുക്കുമെന്ന് പരിപാടികള്‍ വിശദീകരിച്ചുകൊണ്ട് രൂപതാ ഡയറക്ടര്‍ ഫാ, ജേക്കബ് വെള്ളമരുതുങ്കലും സംസ്ഥാന സെക്രട്ടറി പ്രസാദ് കുരുവിളയും അറിയിച്ചു. വാര്‍ത്താ സമ്മേളനത്തില്‍ ആന്റണി മാത്യു, സാബു എബ്രഹാം, ജോസ് കവിയില്‍ എന്നിവരും സന്നിഹിതരായിരുന്നു.
.webp)
0 Comments